خطوات شراء طائر البادجى

حضرتك بتشرى من محل او من هاوى او حتى من اخوك ..
فيه شويه خطوات لازم تعملها قبل ما تتوكل على الله وتاخد قرار الشرا
حنلخصها بسرعه فى كان بند كدا علشان منرجعش نندم ..
تخيلوا معانا الحوار ده كده بسرعه ..
و اول حاجه عينك هى مقياس وخبير لازم تعتمد عليه فى الشرا ..

* طب يا سيدى قول عينى حتبص على ايه ؟
- بص يا سيدى حتبص على شويه حاجات منها ارضيه القفص اللى فيه الطير اللى ناوى تشتريه ،، لو البراز شكله مش مريحك او سائل ولونه ابيض او اخضر ،، الله الغنى
* وحبص على ايه تانى ؟
- حتبص على وقفه الفرد (الطائر) لازم يكون الريش مستف ومتساوى مش منفوش وحركته طبيعيه و بياكل وبشرب قدامك ..

* يعنى انا حستناه ياكل ويشرب يا عم انت ؟
- اه حضرتك مستعجل ليه وراك ايه وسيبك من اللى عاوز يبيع ويقلبك فى كلمتين حلوين احنا مش بناخد من الكلام ده معاك ربع ساعه او نص ساعه
واللى مش عاجبه انك تقيل فى الشرا يدور له على زبون خفيف ..

* تمام زى الفل ،، ابص على ايه تانى ؟
- حضرتك حتبص على ارجل الطائر تكون سليمه والاظافر سليمه وافيهاش لا جرح ولا قشف ولا جدرى .. وتبص على المنطقه اللى فوق الكير لو لقيت لونها بنى بلاش لان ده اما طالع من برد او داخل على برد ..

* الله يفتح عليك وايه تانى ؟
- لازم تلاقى الطائر جناحه سليم ومش متكتف والجناحين فى منسوب واحد مفيش واحد اعلى من التانى لان ده علامه اما لكسر قديم او ورم تحت الجناح وفى الحالتين ده طائر به عيب ..

وبعينك الفاحصه حتبص على اخر كام ريشه من جناح العصفور لازم يكون الجناحين ريشهم سليم والذيل كمان اما سليم او قصير بس بيكمل نمو
مش ديل رايح فى داهيه وبلاش حد يقولك ده بيقلش ..
الطائر فى القلش لا بيوقع ريش السلاحات بالجناح ولا الذيل ..خليك صاحى معايا اوعى تنام منى ..

* لا انا زى الفل ومعاك قول سامعك طب لو ريش الذيل متنسل ومقصف
- والله بص للصحه العامه لو طائر صحته كويسه اتوكل على الله وخده بس لو حاسس انه ضعيف ومتهان بلاش لانه حيزهقك على ما يتظبط ولو دكر تخصيبه مش حيكون تمام ولو نتايه مشاكلها حتكون كتير بلاش احسن

* تمااااااام طب بالنسبه للعين ايه تانى ؟
- لسه يا عمنا عينك قولنا دى خبير شغال لحسابك ،، اتوكل على الله وامسك الفرد فى ايدك وافتح الجناحين برفق وبص فى ريش الاجنحة من جوة لازم يكون مكتمل وبيلمع ومافيش فيه اى نقط سودا لان دى اسمها سوسه ريش ممكن اصابه حديثه ولسه ما ظهرتش على العصفور .. وتظهر عندك وللاسف معديه وزى الوباء

* طب وعلى ايه انت صح لو فيها سوسه بناقص منها وايه تانى ؟
- وانت بتمسك العصفور حتحس انه نوعا ما خايف منك وبيعافر وصحته حتبان فى ايدك لا زايد وزنه ومليس ولا خاسس ومشقوف وعنده السل
جسم انسيابى ومسحوب لو لقيته غلبان فى ايدك بلاش منه

* ربنا يفتح عليك وايه تانى ؟
- الاهم بقى بعد ما تخلص كده بص على نوع الاكل اللى محطوط له لان لما حضرتك حتشتريه اى ما كان نوع العصفور وحطيت له اكل من نوع تانى او حبوب نوع تانى مش حياكل وهو كده كده بيقطع اكل اول كام يوم من تغيير المكان يعنى حتغير له نوع الاكل بالتدريج مش خبط لزق كده

* وصلت كده الله ينور وايه تانى ؟
اخيرا" بقى بلاش تاخد عصفور جنب مروحه لو محل فيه مروحه او محطوط فى سلاكه جنب باب المحل وفيه تيار هوا وبلاش العصفور صاحبه بيعرضه بسلاكه فى الشارع داخل خارج من المحل ..
ولو لقيت العصفور واقف ينهج او فيه اعراض دموع بالعين بلاش منه طبعا لان عنده مرض تنفسى مزمن ممكن يكون دمعه وممكن يكون التهاب رئوى او شعبى ..
الله الغنى عنه وليه ناخده ونقعد نعالج فيه ..

وكده اقدر اقولك خد العصفور وانت مطمن وروح طبعا تحطه لوحده 10 -15 يوم وبلاش استعجال
لا هو حيموت من غير وليف ولا انت حتاخد اكتر من رزقك لو شغلته بدرى
اعزله وحط له مطهر معوى يومين حيبان لو شايل ميكروب معوى معدى مثلا"
وحط له شويه فيتامينات وعوده على نظام اكلك بتاع عصافيرك فى الاسبوعين دول .. وطبعا راقب نشاطه والاخراج والفضلات بتاعته
ولو لا قدر الله بعد كل ده طلع مصاب اوعى تستخسر فلوسك وتغامر بدخوله على طيرك
المعوض مخلف صدقنى - حاول تعالجه ينوبك ثواب وياخد وقت زى ما ياخد
وبلاش تبيعه مريض علشان محدش يدعى عليك
ربنا يرزقنا واياك يا غالى الخير كله وموسم موفق ان شاء الله

#منقول